Премьер-министр Олжас Бектеновтің төрағалығымен су тасқынына қарсы шараларды үйлестіру және қарғын су салдарын жою жөніндегі республикалық штабтың отырысы өтті. Бұл туралы Aqshamnews.kz сайты хабарлайды.
Отырыс барысында:
- Экология және табиғи ресурстар министрі Ерлан Нысанбаев өңірлердегі гидрометеорологиялық жағдай туралы баяндады.
- «Tasqyn» жүйесіндегі су тасқыны моделдеу нәтижелерін Цифрлық даму, инновациялар және аэроғарыш өнеркәсібі министрі Жаслан Мәдиев таныстырды.
- Су нысандарының қазіргі жағдайын Су ресурстары және ирригация министрі Нұржан Нұржігітов баяндады.
- Төтенше жағдайлар министрі Шыңғыс Әрінов ықтимал су тасқынына жедел әрекет ету дайындығы туралы ақпарат берді.
Су тасқыны қаупі жоғары аймақтар Шығыс Қазақстан, Қарағанды, Ақмола, Солтүстік Қазақстан, Қостанай, Ақтөбе, Абай, Ұлытау облыстары деп белгіленді. Орташа қауіп Алматы, Жетісу, Жамбыл, Батыс Қазақстан және Атырау облыстарында байқалып отыр.
Қазіргі таңда ел аумағының 67%-ы қар астында. Қостанай, Ақмола, Павлодар, Қарағанды облыстарында тоң қалыңдығы 130-150 см-ге дейін жеткен. Синоптиктердің болжауынша, наурыз және сәуір айларында ауа температурасы жоғарылап, жауын-шашын көп болады, бұл өз кезегінде су тасқыны қаупін арттыруы мүмкін.
Осыған байланысты Ақмола, Батыс Қазақстан, Ұлытау, Қарағанды және Солтүстік Қазақстан облыстарында алдын алу шараларын жеделдету тапсырылды.