Бүгін, 9 қаңтарда Алматыда қазақстандық актер Мұрат Бисенбинді ақтық сапарға шығарып салу рәсімі өтті. Рәсім барысында өнер иесінің әкесі Болат ұлының соңғы күндері туралы көзіне жас алып айтып берді, - деп хабарлайды aqshamnews.kz тілшісі.
"Ауырғанына бір жарым жыл болды. Башқұртстанға да барып емделді. Бұған дейін "жаман ауруға" қарсы тұру керек, күресу керек деп жүретін. Бірақ кейінгі кезде қатты қиналып кетті. Жарты ай бұрын инсульт алды. Орталықта 11 күн жатты. Кейінгі кездері тамақ та іше алмай қалды. 8 қаңтарда таңғы сағат 8-де хабарластым. Сол кезде "Мұратты кетіп қалды" деген қаралы хабар келді", - деді ол.
Болат Бисенбин баласының қазасы ата-ана үшін орны толмас ауыр қайғы екенін айтып, Мұраттың өмір салтын да еске алды.
"Балаңның өлімін көру - ең ауыр. Ол мені жерлеуі керек еді, бірақ бәрі керісінше болды… Ішпейтін, шекпейтін, спортпен шұғылданатын. Қандай актер болғанын халық біледі ғой", - деді әкесі көзіне жас алып.
Мұрат Бисенбинмен қоштасуға келгендердің арасында қазақстандық киноның белгілі тұлғалары - Асан Мәжит, Ерден Телемісов, Берік Айтжанов, Жан Байжанбаев, Еділ Анарбай, Санұржан Сүлейменов, Олжас Тоғымбет және басқа да танымал актерлер болды.
Жиналған жұрт марқұмның отбасы мен жақындарына қайғырып көңіл айтып, Мұрат Бисенбиннің өнердегі еңбегі мен адамдық болмысын еске алды.
Мұрат Бисембин 1972 жылы 11 қазанда Қызылордада туған. Алдымен политехникалық институтты ауыл шаруашылығының инженер-механигі мамандығы бойынша тәмамдағанымен, кейін актерлік жолды таңдаған. Өнер иесі отбасылы, үш баланың әкесі болған.
Редакция өнер иесінің отбасы мен жақындарына қайғыра көңіл айтады.
