Астанада Республика күні мерекесіне және «Еlorda Аqparat» медиахолдингіне қарасты «Астана ақшамы» мен «Вечерняя Астана» газеттерінің 35 жылдық мерейтойына арналған «Объективте – Астана айшықтары» атты фотокөрме өтеді, деп хабарлайды aqshamnews.kz
Көрменің басты мақсаты – тәуелсіздік жылдарындағы Астананың қалыптасу, даму және өркендеу жолын фотообъектив арқылы көрсету, сондай-ақ кәсіби фотожурналистика өнерін дәріптеу.
Көрмеге «Еlorda Аqparat» медиахолдингі құрамындағы редакцияларда қызмет ететін Сұлтан Сейітов, Василий Крась және Оңалхан Өнерхан сынды фототілшілердің еңбектері қойылады. Әрқайсысының туындылары Астананың тыныс-тіршілігін, сәулеттік келбетін, тарихи сәттері мен адамдарының бейнесін шебер жеткізеді.
Көрмеге қойылған суреттер елорданың әр кезеңіндегі даму динамикасын: жаңа астананың алғашқы құрылыс сәттері, тәуелсіздік жылдарындағы басты тарихи оқиғалар, заманауи архитектура мен мәдени өмір, елорда тұрғындарының өмірінен алынған репортаждық сәттер бейнеленген.
Көрме – елорда жылнамасын фотообъектив көзімен шолып, Астананың айшықты бейнесін жаңа қырынан тануға мүмкіндік береді.