Қазан қаласында БРИКС саммиті аясында қазақтың ұлы ақыны, философы және ағартушысы Абай Құнанбаевқа арналған ескерткіштің ашылуы жоспарлануда, деп хабарлайды aqshamnews.kz.
Ресейлік «БИЗНЕС Online» порталының хабарлауынша, Татарстанның Мәдениет министрлігіне сілтеме жасай отырып, ескерткіштің ресми ашылу салтанаты 24 қазанда өтеді.
Қазіргі уақытта монумент Назарбаев көшесінде орнатылған, бірақ әлі де полиэтилен жамылғымен жабылған күйде тұр. Ескерткіш 2018 жылы орнатылған қола Тайқазанның жанындағы шағын саябақта бой көтереді.
Әлемде Абайға арналған 30-дан астам ескерткіш пен бюст бар. Олар тек Қазақстанда ғана емес, сондай-ақ Берлин, Париж, Мәскеу, Нью-Дели және басқа да қалаларда орнатылған. Мәселен, фотода Абай Құнанбаевтың Мәскеудегі ескерткіші бейнеленген.