Премьер-министр Олжас Бектенов «Kazakh Tourism» ұлттық компаниясы» АҚ басқарма төрағасы Талғат Ғазизовқа жаңа қызметінде нақты нәтиже көрсету керегін ашық айтты, деп хабарлайды Aqshamnews.kz тілшісі.
Үкімет басшысы нәтиже болмаса, қызметтен кетуге тура келетінін ескертті.
Бүгін Үкімет отырысында «Kazakh Tourism» басшысы туризмді дамыту мәселелері бойынша баяндама жасады. Отырыстың соңында премьер-министр ол қызметке жаңадан келгенін, бірақ нақты нәтиже күтетіні туралы ескерту жасады:
«Талғат Жанатұлы, сіз бұл қызметке жаңадан келіп отырсыз. Бірақ өзіңізден нақты нәтиже күтеміз. Нәтиже болса, әрі қарай жұмыс істей бересіз. Нәтиже болмаса, қоштасамыз. Келістік пе?»
Талғат Ғазизов қысқа жауаппен «Келістік» деді.
Айта кетейік, Талғат Ғазизов 2026 жылғы 16 қаңтарда «Kazakh Tourism» басқарма төрағасы болып тағайындалған. Бұған дейін ол 2023 жылдан бері «Қазпошта» АҚ басқарушы директоры – басқарма мүшесі қызметін атқарған.