Мәнерлеп сырғанаудан Олимпиада чемпионы Михаил Шайдоров 23–29 наурыз күндері Прагада өтетін әлем чемпионатына қатыспайды, – деп хабарлайды aqshamnews.kz тілшісі.
Бұл туралы Sportbugin.kz хабарлады.
2025 жылдың қаңтары мен 2026 жылдың ақпаны аралығында спортшы әлем чемпионаты, Азия ойындары, Төрт құрлық чемпионаты, Гран-при кезеңдері мен финалы және Олимпиада ойындарын қоса есептегенде, ең ірі 10 халықаралық турнирде өнер көрсетті. Олимпиадалық маусымда үздіксіз жаттығып, әр додада жоғары нәтиже көрсетуге бар күшін салған.
Осыған байланысты бапкерлер штабы спортшыға демалыс беру жөнінде шешім қабылдады. Қазақстан құрамасының бас бапкері Әсем Қасанованың айтуынша, бір жыл бойғы қарқынды жарыс кестесі физикалық әрі психологиялық тұрғыдан үлкен жүктеме түсірген. Сондықтан Шайдоров толыққанды тынығып, қажетті медициналық және сауықтыру шараларынан өтеді.
Прагада өтетін әлем біріншілігінде Қазақстан намысын Софья Самоделкина мен Диас Жиренбаев қорғайды.