Алматыда белгілі қоғам белсендісі, атышулы Амантай қажы үстінен қозғалған қылмыстық іске қатысты Аqshamnews.kz тілшісіне пікір білдірді. Ол өзіне тағылған айыпты жоққа шығарды.
Амантай қажының жауабы
“Амантай қажыны 15 тәулікке отырғызып қойды деп жүргеннің бәрі өтірік. Шын мәнінде ештеңе де болған жоқ, жүрмін ғой міне. Мен стадионға 50 жылдан аса барамын. Сол кезде Биғайша деген әйел ішіп алып, алдымнан шығып, құшақтайды. Мен қолын қағып жібердім болды. Мен оны ұрған жоқпын, оның үстіне итермедім де. Артынша ауруханаға бардық. Оған қатты ештеңе болмаған. Қазір жүр шай ішіп”, - дейді Амантай қажы.
Бұған дейін не айтылды?
Амантай қажы зейнеткер әйелді баспалдақтан қасақана итеріп жіберген деген күдікпен қажыға қатысты тергеу бастаған болатын.
Алматы қаласы Полиция департаментінің мәліметінше, Алмалы аудандық полиция басқармасы аталған дерек бойынша ҚР Қылмыстық кодексінің 107-бабы ("Денсаулыққа қасақана орташа ауырлықтағы зиян келтіру") бойынша іс қозғаған. Зейнеткер әйелдің алған жарақатының ауырлық деңгейін анықтау үшін сот-медициналық сараптама тағайындалды. Сараптама нәтижесіне сай, тергеу шеңберінде процессуалдық шешім қабылданбақ.
Қандай жаза қарастырылған?
Егер қажының кінәсі дәлелденсе, заң бойынша оған:
-
екі жылға дейін бас бостандығынан айыру, немесе
-
мың айлық есептік көрсеткіш (шамамен 4 миллион теңге) көлемінде айыппұл салынуы мүмкін.