Қазақстан республикасының мемлекет және қоғам қайраткері, көрнекті қаламгер-журналист, саясаткер Қуаныш Сұлтанов 80 жасқа келді. Алматыдағы Ұлттық кітапханада «Қазақтың Қонаевы», «Отыз жылдағы ой-толғау» атты екі кітаптың тұсаукесер рәсімі өтті, - деп хабарлайды aqshamnews.kz.
Жиынға қоғам қайраткерлері, ақын-жазушылар, саясаткерлер, мәдениет пен өнер өкілдері қатысты.
Жиынға қатысушылар сексеннің сеңгіріне мемлекет пен қоғам алдында биік абыроймен жеткен Қуаныш Сұлтанұлының жүріп өткен өмір жолынан естеліктер айтып, әр кезеңдегі қызметтері жайында ой өрбітті.
– Қакең қазақтың сүйікті перзенті Димаш Ахметұлымен бірге қызмет істеді. Тәуелсіздіктен бері ел тірлігіне елеулі үлес қосып келеді. Алғашқы ақпарат министрі, Қытайда елші, Сенатор, Мәжіліс депутаты және түрлі лауазымды қызметтер атқарды. Қайда жүрсе де ұлтқа қызмет қылды, – деді ақын Нұрлан Оразалин.
Алқалы жиын ортасында Д.Қонаев атындағы қоғамдық қор мемлекет және қоғам қайраткері Қуаныш Сұлтановқа "Қонаев орденін" табыстады.
Тұсауы кесіліп, көпшілік оқырманға жол тартқан кітап жайында Д.Қонаев қоры басшысы Елдар Қонаев өз пікірін де ортаға салды:
– Кітапты оқып, қайран қалдым. Әсіресе Кеңестік Қазақстан басшысы Димаш Ахметұлының жүріп өткен өткелдері, қиын уақыттары анық жазылған. Сол дәуірдің бәрін көзімен көріп, ішінде болды. Тәуелсіздікке дейін, кейін де өте жауапты қызметтерде болды , – деді қоғамдық қор жетекшісі.
