Оқу-ағарту және Ішкі істер министрліктері жергілікті атқарушы органдармен бірлесіп, орта білім беру ұйымдарында бітіру кештерін өткізу тәртібін нақтылады. Осыған байланысты арнайы бірлескен бұйрық қабылданбақ, – деп хабарлайды aqshamnews.kz тілшісі.
Қабылданған шаралар ең алдымен оқушылардың қауіпсіздігін қамтамасыз етуге, олардың құқықтарын қорғауға және құқықбұзушылықтардың алдын алуға бағытталған.
Жаңа талапқа сәйкес, аттестат табыстау рәсімі тек білім беру ұйымдарының ғимараттарында өткізілуге тиіс. Сондай-ақ, бітіру кештерін мектептен тыс жерде ұйымдастыруға жол берілмейді.
Құжатта оқушылардан, олардың ата-аналарынан немесе заңды өкілдерінен ақша жинауға, сондай-ақ өзге де материалдық құндылықтар талап етуге қатаң тыйым салынатыны атап көрсетілген.
Бұдан бөлек, жергілікті атқарушы органдарға қаржылық шығынды қажет етпейтін тәрбиелік, мәдени және ағартушылық іс-шараларды ұйымдастыру, сондай-ақ, түсіндіру жұмыстарын жүргізу тапсырылды.
Ал ішкі істер органдарына қоғамдық тәртіпті сақтау, құқық бұзушылықтың алдын алу және оқушылардың қауіпсіздігін қамтамасыз ету шараларын күшейту міндеті жүктелді.