Мамандар кемшіліктерді дер кезінде жоюға мүдделі.
Жыл басынан бері Медициналық сақтандыру қорына алматылықтардан 1 018 шағым түсті. Бұл туралы қордың Алматы қалалық филиалының директоры Тілеухан Әбілдаев мәлім етті, деп хабарлайды Almaty-akshamy.kz.
Оның айтуынша, түскен өтініштің басым бөлігі медициналық көмектің сапасы мен консультациялық-диагностикалық қызметті күту мерзімінің ұзақтығына, көмек көрсетуден бас тарту мәселесіне қатысты.
Шағымдар қордың fms.kz ресми сайты, 1406 байланыс орталығы, Qoldau 24/7 мобильді қосымшасы арқылы түскен.
«Пациенттерді қолдау және ішкі аудит қызметі бас дәрігерге бағынады. Оның міндеті - қызмет көрсету сапасын жақсарту. Сол себепті аудит қызметі медициналық көмектің пациенттерге толыққанды әрі сапалы көрсетілуін қамтамасыз етуге, кемшіліктерді анықтап, дер кезінде жоюға мүдделі», - дейді филиал басшысы Тілеухан Әбілдаев.
Ол қандай жағдайда пациенттерді қолдау қызметінің көмегіне жүгінуге болатынын да атап өтті. Мысалы, шұғыл көмек көрсету үшін сақтандырылған статусын талап етсе, сақтандырылмағандықтан учаскелік дәрігердің қабылдауына жазудан бас тартса, емханаға тиесілі аумақта тұрсаңыз да учаскелік дәрігер үйге келіп қарауға келіспесе, салалық маманның жоқтығына байланысты немесе алдағы бір айда орын жоқ деген желеумен дәрігердің қабылдауына жазбаса, тиісті диагностикалық тексерулер мен зертханалық қызметтерге жолдама берілмесе, дәрігер қабылдаған кезде дөрекілік танытса, медициналық көмектің сапасы көңілден шықпаса, қойылған диагноз бен тағайындалған емнің дұрыстығына күмәнданған жағдайда, медициналық деректерден қате кетсе немесе көрсетілмеген қызмет «көрсетілді» деп жазылса, жалпы, медицина қызметіне көңіліңіз толмаса және тағы да басқа жағдайларда ішкі аудит қызметіне жүгінуге болады.