Алматы облысының Қарасай ауданында медбикенің өліміне күдікті ер адам ұсталды, деп хабарлайды Almaty-akshamy.kz polisia.kz-ке сілтеме жасап.
«7 тамыз күні сағат 17:00 шамасында Қарасай ауданының ауруханасына кеуде қуысында сұғылып-кесілген жарақаттары бар 45 жастағы әйел түскенін, кейін ол алған жарақаты салдарынан қаза болғанын хабарлаймыз.Аталған дерек ҚР Қылмыстық кодексінің 99-бабы (Кісі өлтіру) бойынша аудандық полицияда тіркелді. Арнайы іс-шара барысында тәртіп сақшылары күдікті – Кошмамбет ауылының 42 жастағы тұрғынының жеке басын анықтап, оны бір сағат ішінде «ізін суытпай» ұстады.
Аталған деректі тергеудің толықтығын, жан-жақтылығын және объективтілігін қамтамасыз ету мақсатында сот-медициналық сараптама тағайындалып, тергеу іс-шаралары жүргізіліп жатыр»,- деп хабарлады полициядан.
Қылмыс марқұм әйелдің жұмыс орнында жасалған.
«Ұсталған ер адамның айтуынша, болған оқиға жеке қарым-қатынасқа байланысты және оның әйелдің кәсіби қызметіне қатысы жоқ. ҚР Қылмыстық іс жүргізу кодексінің 201-бабына сәйкес өзге ақпарат жария етуге жатпайды», - делінген мәліметте.