Аққала Олаф, ақ аю, Кинг-Конг, «Шрек» мультфильміндегі Зімбір адам, Жаңа жылдың символы — шырша, сондай-ақ, Алматының символы – қар барысы балаларды келе жатқан мерекемен құттықтады.
Бұл маскоттар 20 желтоқсан күні басталған «Алматының 8 кереметі: отбасылық мереке — таңғажайып Жаңа жыл» атты ауқымды мерекелік бағдарлама аясында арнайы жасалған, деп хабарлайды aqshamnews.kz.
Ертегілер мен мультфильм кейіпкерлері балалармен бірге Астана алаңында, Абай алаңында, Тұңғыш Президент саябағында, Арбатта, Панфилов көшесінде және «Нұрлы тау» бизнес орталығының алдындағы алаңда өткен шеберлік дәрістері мен ойындарға қатысты.
Балалар ағаштан жасалған шырша ойыншықтарын бояп, ыдыстарды суреттермен безендірді, музыкалық қобдишаларды әшекейлеп, гипстен жасалған мүсіншелерге жан бітірді. Оларға тәжірибелі қолөнершілер бағыт-бағдар беріп, көмектесіп отырды. Әр қатысушыға алжапқыштар, қолғаптар мен крафт сөмкелер берілді. Уақытын қызықты әрі пайдалы өткізген балақайлар өз қолдарымен жасаған кәдесыйларды естелік ретінде үйлеріне алып кетті.
Шеберлік дәрістерін қолөнершілер ғана емес, сонымен қатар цирк және Қуыршақ театрының артистері де өткізді. Балалар доппен жонглерлік өнерді үйренді, арнайы тақтайда тепе-теңдікті сақтауды меңгеріп, хула-хуппен қызықты ойындарға қатысты. Сонымен қатар, Алматыдағы алаңдарда Аяз ата мен Ақшақардың, эквилибристтердің, жонглерлердің қойылымдары, сұйық азоттың әсерімен өткізілген ғылыми шоу және үйретілген иттердің нөмірлері ұсынылды. Ашық аспан астында Қуыршақ театрының артистері қойылымдарын паш етсе, «Алатау» театрының және «Алматы әуендерінің» әншілері концерттерін өткізді.
Айта кетейік, 30 желтоқсан күні Астана алаңында сағат 17:00-ден 18:30-ға дейін таңғажайып цирк шоуы өтеді. Эквилибристер тамаша трюктерімен таңғалдырса, жонглерлер доптарды, ұршық пен сақиналарды шебер меңгергенін көрсетеді. Атлеттер өздерінің күш-қуаты мен төзімділігін танытса, сайқымазақ интерактивті ойындар мен қойылымдар арқылы көрермендерге қуаныш сыйлайды.
Бағдарламаның шарықтау шегі – фаер-шоу болады. Онда артистер отпен жасалатын ерекше трюктер көрсетіп, халықты таңқалдырмақ. Одан кейін сағат 18:30-дан 20:00-ге дейін сахнада «Ұлытау» әйгілі этно-рок тобы және «Алатау» дәстүрлі өнер театрының артистері өнер көрсетеді. Олар көрермендерге әсерлі композициялар мен ұмытылмас көңіл-күй сыйлайды.
Сондай-ақ, 30 желтоқсанда сағат 18:30-дан 20:00-ге дейін Абай алаңында Мемлекеттік қуыршақ театрының артистері жарқын эмоциялар мен жаңа жылдық сиқырға толы мерекелік бағдарлама ұсынады. Кештің басты кейіпкерлері Аяз Ата, Ақшақар, көңілді қар адамдары және қонақтарды қызықты ойындарға, билерге және флешмобтарға тартатын қуыршақтар болады.
31 желтоқсан күні Алматыда эстрада жұлдыздардың қатысуымен екі үлкен концерт өтеді.
Абай алаңында 19:00-ден 21:00-ге дейін Бүркіт, Ақбота-Нұр, Диана Исмаил, Кенжебек Жанәбілов және басқа да артистер өнер көрсетеді.
Астана алаңында концерт сағат 21:00-де басталып, 2025 жылдың 1 қаңтары сағат 01:00-де аяқталады. Түн жарымда отшашу болады. ҚБТУ алдындағы сахнада Ерсейіт Әлиев, Елбол Қуанбек, Ұлжан Ағлақова, Chingiz Typhoon, Makvin, Orynkhan, 6ellucci, Мархаба Сәби, Moldanazar және RaiM өнер көрсетеді.
Мерекелік іс-шараға дайындық жұмыстарына байланысты 31 желтоқсанда сағат 8:00-ден бастап Төле би көшесінің Назарбаев даңғылынан Абылай хан даңғылына дейінгі бөлігі толығымен жабылады. Жол қозғалысы 2025 жылдың 1 қаңтарында сағат 02:00-де қайта ашылады. Түсіністікпен қарап, алдын ала қозғалыс бағытын жоспарлауды және жол қозғалысы ережелерін қатаң сақтауды сұраймыз.