Былтыр күзде кәсіпкер және Ақтөбе қалалық мәслихатының депутаты Санья Муратова мас күйінде көлік жүргізгені үшін ұсталған болатын.
Ішімдік ішіп рөлге отырған бұрынғы депутат қоғамдық кеңеске мүше болды, деп хабарлайды aqshamnews.kz «Диапазон»-ға сілтеме жасап.
Қоғамда үлкен резонанс тудырған оқиғадан кейін Санья Муратова депутаттық өкілеттілігін тоқтатқан болатын. Сот оны сырттай жеті жылға жүргізуші куәлігінен айырып, 15 тәулікке қамауға алған еді.
Бұл жолы Санья Муратова Ақтөбе облысының қоғамдық кеңесінің жаңа мүшесі ретінде елдің назарын өзіне аударды. Бұл тағайындау қала тұрғындарының наразылығын туғызды. Көптеген ақтөбеліктер мас күйінде көлік жүргізген экс-депутаттың қоғамдық мүдделерді қалай қорғай алатынына таңданыс білдіруде.
Қоғамдық кеңестің өкілеттігі кең. Оның мүшелері мемлекеттік органдардың қызметін талқылауға және шешім қабылдауға қатысып, атқарушы органдардың қызметіне бақылау жасайды, олардың жұмысының ашықтығын қадағалайды.