Ұлыбританияның бұрынғы премьер-министрі Маргарет Тэтчерге берілген «Достық» ордені Англияда сатылымға қойылды. Орденнің бағасы 12 500 фунт стерлинг деп белгіленген, деп хабарлайды aqshamnews.kz
Антиквариат сатумен айналысатын Peter Harrington компаниясы сайтында Тэтчердің «Достық» орденін сату туралы хабарландыру жарияланды. Орденді 2001 жылы Нұрсұлтан Назарбаевтың өзі Тэтчерге жеке тапсырған. Peter Harrington мәліметінше, Тэтчер 1995 жылы тағайындалған бұл марапатты иеленген жетінші адам болған.
«Бұл марапат құпия түрде табысталған болуы мүмкін, өйткені оны марапаттау туралы ешбір жария деректер табылмаған», — делінген хабарламада.
Маргарет Тэтчер мен Нұрсұлтан Назарбаев алғаш рет 1991 жылы, Тэтчер премьер-министр қызметінен кеткеннен кейін кездесті. «Темір ханым» Назарбаевты оң бағалаған.