Маңғыстау облысында ер адам полицияның көзінше өзін өртемек болған. Оқиғаның видеосы әлеуметтік желіде тарады, деп хабарлайды Aqshamnews.kz Lada.kz-ке сілтеме жасап.
Оқиға Бейнеу ауылындағы полиция бөліміне қарасты бақылау-өткізу пунктінде болған. Полицияның мәліметінше, ер адам бұған дейін трассада патрульдік қызмет тоқтатқан көлік жүргізушісі болған. Ол жол қозғалысы ережесін бұзғаны үшін әкімшілік жауапкершілікке тартылған.
Біраз уақыттан кейін ер адам өзі полицияның бақылау-өткізу пунктіне келіп, инспекторлардың әрекетіне көңілі толмағанын білдірген. Сол жерде ол үстіне белгісіз сұйықтық құйып, өзін өртемек болған.
Полиция қызметкерлері оның әрекетінің алдын алып, ер адамды медициналық мекемеге жеткізді.
«Қазір аталған дерек бойынша қылмыстық іс қозғалды. Сотқа дейінгі тергеу жүргізіліп жатыр, оқиғаның мән-жайы анықталып жатыр», — деп хабарлады облыстық полиция департаменті.
