Маңғыстау облысында Ұлыбритания азаматтары мінген көлік сорға батып, қозғала алмай қалған, – деп хабарлайды aqshamnews.kz тілшісі. Бұл туралы Төтенше жағдайлар министрлігінің баспасөз қызметі мәлімдеді.
112 пультіне Маңғыстау ауданындағы Тұзбайыр шатқалы маңында шетелдік туристер мінген көліктің сорлы жерде тұрып қалғаны туралы хабарлама түскен. Көлікте екі ересек адам мен 12 жастағы бала болған. Олардың барлығы — Ұлыбритания азаматтары.
Оқиға орнына құтқарушылар дереу аттанды. Жер бедерінің күрделі болуы және топырақтың батпақты әрі жабысқақ келуі салдарынан көлікті шығару жұмыстары бір тәуліктен астам уақытқа созылған.
Құтқарушылар арнайы техниканың көмегімен көлікті сордан шығарып, қауіпсіз бағытқа жеткізді.
Зардап шеккендер жоқ. Туристер медициналық көмекке мұқтаж болмаған.