Әлеуметтік желілерде Маңғыстау облысындағы шекара заставасында биыл көктемде әскерге шақырылған сарбаз қаза болғаны туралы ақпарат тарады, - деп хабарлайды Аqshamnews.kz тілшісі.
Оқиға 7 қазанда "Үстірт" шекара заставасында болған. Бөлім командирінің тапсырмасымен әскери қызметші дизель-генератор радиаторын жуу үшін бензин әкелу мақсатында қоймаға барған.
Тапсырманы орындау кезінде сарбаз жанармай буына уланып, есінен танып қалған. Шамамен 10 минуттан кейін жерде жатқан күйде табылған. Сарбаз зардап шеккен қызметшіге көмек көрсетуге тырысқан, алайда ол көз жұмған.
ҰҚК баспасөз қызметі әскери қызметшінің қаза болғаны туралы ақпаратты растады.
"Маңғыстау облысы бойынша Шекара қызметі департаментінде қайғылы жағдай болды, мерзімді қызметтегі әскери қызметші қаза тапты. Алдын ала мәлімет бойынша, қайғылы оқиғаға техникалық жұмыстар кезінде қауіпсіздік шараларының сақталмауы себеп болған", – деп хабарлады ҰҚК.
Ведомствоның мәліметінше, полиция органдары қылмыстық іс қозғаған, қосымша қызметтік тексеріс те жүргізіліп жатыр.
"ҰҚК Шекара қызметі қаза болған сарбаздың туған-туыстары мен жақындарына қайғырып, көңіл айтады", – делінген баспасөз қызметінің хабарламасында.