Маңғыстау облысында 16 қаңтарға қараған түні Ақтау – Бейнеу бағытында қатынаған жолаушылар автобусы жол апатына ұшырап, салдарынан төрт адам көз жұмды. Тағы үш жолаушы әртүрлі дәрежедегі жарақат алып, ауруханаға жеткізілді, - деп хабарлайды aqshamnews.kz тілшісі.
2026 жылғы 16 қаңтар күні шамамен сағат 01:03-те KZ-11 "Доссор – Құлсары – Бейнеу – Сайөтес – Шетпе – Жетібай – Ақтау" республикалық маңызы бар автомобиль жолының 383-шақырымында Yutong маркалы жолаушылар автобусының қатысуымен жол апаты тіркелді.
Алдын ала мәліметтерге сәйкес, автобус Ақтаудан Бейнеу ауылы бағытына қарай қозғалып келе жатқан. Жүргізуші көлікті басқара алмай, нәтижесінде автобус аударылып кеткен.
Жол-көлік оқиғасы салдарынан оқиға орнында төрт жолаушы қаза тауып, үш адам түрлі дәрежедегі дене жарақаттарымен медициналық мекемелерге жеткізілді. Автобуста барлығы 50 жолаушы болғаны анықталды.
"Автобус 2025 жылғы 19 желтоқсанда техникалық байқаудан өткен және "CASPIAN TRANS CORPORATION" ЖШС-не тиесілі. Апат болған автожол учаскесі техникалық II санатқа жатады. Жол жамылғысы асфальтбетон, ені 9 метр. Тексеру барысында жол жамылғысынан ақаулар анықталмаған, жол белгілері бекітілген дислокацияға сәйкес толық көлемде орнатылған. Оқиға тәуліктің қараңғы уақытында болған", - делінген хабарламада.
Апат кезінде көлік құралын 1985 жылы туған жүргізуші басқарған. Алдын ала деректер бойынша, жол-көлік оқиғасы болған жерден шамамен 200 шақырым бұрын екінші жүргізушіге ауысу жүзеге асырылған.
Бұл дерек бойынша Маңғыстау облысы Полиция департаменті жол-көлік оқиғасының барлық мән-жайын анықтауға бағытталған кешенді тергеу шараларын жүргізіп жатыр. Тергеу нәтижесі бойынша тиісті процестік шешім қабылданатын болады.