Алматыда жаңа Конституция жобасы бойынша республикалық референдумға Қазақстанның белгілі мәдениет, өнер және әдебиет қайраткерлері қатысты. Дауыс бергендердің қатарында танымал артистер, композиторлар, жазушылар және шығармашылық зиялы қауым өкілдері болды, – деп хабарлайды aqshamnews.kz тілшісі.
Белгілі композитор, Қазақстанның халық артисі және Мемлекеттік сыйлықтың лауреаты Алтынбек Қоразбаев Оқушылар сарайында орналасқан референдум учаскесінде дауыс берді. Оның айтуынша, мұндай маңызды оқиғаға қатысу – әр азаматтың ел болашағына қосқан үлесі.
«Мемлекеттің болашағы бүгінгі таңдауға байланысты. Мен бүгін Қазақстанның жарқын әрі тұрақты болашағы және өскелең ұрпақтың игілігі үшін дауыс бердім», — деді композитор.
Референдумға Қазақстанның халық артисі, актер әрі режиссер Досқан Жолжақсынов пен Қазақстан Республикасының еңбек сіңірген қайраткері, әнші әрі тележүргізуші Қарагөз Сүлейменова да қатысты.
Досқан Жолжақсыновтың айтуынша, азаматтардың мұндай маңызды оқиғаларға қатысуы қоғам үшін айрықша мәнге ие.
«Бұл референдум еліміздің болашағы үшін маңызды кезең. Әрбір азаматтың дауысы – қоғам алдындағы жауапкершілік әрі мемлекеттің дамуына қосқан үлесі», — деді ол.
Референдумға әдеби орта өкілдері де белсенді қатысты. Олардың қатарында ақын әрі қоғам қайраткері Жүрсін Ерман, жазушы Кәдірбек Сегізбаев және Медеу ауданындағы №359 учаскеде дауыс берген белгілі жазушы, ұлттық дәстүрді насихаттаушы Зейнеп Ахметова бар.
Мәдениет қайраткерлерінің айтуынша, референдумға қатысу – азаматтық жауапкершіліктің көрінісі әрі ел болашағына қатысты пікір білдіру мүмкіндігі. Олардың қатысуы қоғамда белсенді азаматтық ұстанымның маңызын тағы бір мәрте көрсетті.