Америкалық NBC Sports телеарнасы Италияда өткен Олимпиада ойындарының қорытындысын шығарып, турнирдегі ең күтпеген жеңістер мен ең үлкен көңіл қалдырған сәттерді атап өтті, – деп хабарлайды aqshamnews.kz тілшісі.
Шолудың алғашқы бөлімі ерлер арасындағы жеке сырғанаудағы бәсекеге арналды. Бұл сында алтынға басты үміткер ретінде АҚШ өкілі Илья Малинин аталғанымен, нәтижесінде Олимпиада чемпионы атағы қазақстандық Михаил Шайдоровқа бұйырды.
NBC Sports мәліметінше, 21 жастағы Малинин 2021 жылдан бері ересектер деңгейінде өнер көрсете бастаған сәттен-ақ ерлер мәнерлеп сырғанауының көшбасшыларының біріне айналған. Ол тарихта алғаш болып төрттік аксель орындаған спортшы ретінде танылып, еркін бағдарламада әлемдік рекорд орнатқан. Командалық жарыстағы табысты өнер көрсетуі АҚШ құрамасының алтын алуына да әсер еткен. Ал жеке турнирде қысқа бағдарламадан кейін Малинин жапониялық Юма Кагиямадан бес ұпайға озып тұрған.
Алайда мақала авторларының пікірінше, аса жоғары күтім мен қысым америкалық спортшының өзіне кері әсер еткен.
Еркін бағдарламада «төрттік секірулердің құдайы» атанған Малинин бірқатар қателікке жол берді: жоспарланған элементтердің орнына бірлік аксель, қос луп және қос сальхов орындаған.
Осы тұста қысқа бағдарламадан кейін небәрі бесінші орынға жайғасқан қазақстандық Михаил Шайдоров мінсіз өнер көрсетті. Оның бағдарламасында бес төрттік секіру орындалып, тек бір ғана ұсақ қате байқалған.
"198,64 балл жинаған Шайдоров барлық болжамды жоққа шығарып, Қазақстанға қысқы Олимпиададағы екінші алтын медальді алып келді", деп жазады басылым.
NBC Sports Малининнің жеңілісін АҚШ құрамасы үшін ең ауыр сәттердің бірі ретінде бағаласа, Шайдоровтың жеңісін Олимпиаданың басты сенсацияларының қатарына қосты.