Қазақстанның Қылмыстық істер жөніндегі кассациялық соты Абай облысында 6 жылға сотталған әйелдің ісін қайта қарап, жаза мерзімінің өтелуіне байланысты оны сот залынан босатты, – деп хабарлайды aqshamnews.kz тілшісі.
Сот мәліметінше, оқиға 2024 жылдың шілде айында болған. Екі ер адам жанжалдасып жатқан сәтте, олардың бірі әйелдің күйеуін тұншықтырған. Күйеуін құтқаруға тырысқан әйел қолына ағаштың сынығын алып, шабуыл жасаған ер адамды мойын тұсынан бір рет ұрған. Салдарынан ол алған жарақатынан көз жұмған.
Алғашқы сот инстанциясы әйелді Қылмыстық кодекстің 106-бабы 3-бөлігі бойынша кінәлі деп танып, 6 жылға бас бостандығынан айырған. Сондай-ақ оны марқұмның туыстарына 3 млн теңге көлемінде өтемақы төлеуге міндеттеген. Бұл шешімді облыстық сот та өзгеріссіз қалдырған.
Алайда кассациялық сот әйелдің әрекеті күйеуін қорғау мақсатында жасалғанын ескерді. Сонымен бірге сот оның қорғану шегінен асып кеткенін де атап өтті. Істі қайта саралау кезінде әйелдің жасаған ісіне өкініш білдіруі, кәмелетке толмаған баласының болуы, III топтағы мүгедектігі және оқиғаға жәбірленушінің өз құқыққа қайшы әрекеті себеп болғаны назарға алынған.
Нәтижесінде сот әйелдің әрекетін Қылмыстық кодекстің 112-бабы 2-бөлігіне қайта саралап, оған 1 жыл бас бостандығынан айыру жазасын тағайындады. Бұл мерзім кассациялық қарау сәтіне дейін толық өтелгендіктен, әйел сот залынан босатылды.