Шетелдік психиатр Яго Фернандестің айтуынша, көз жасын тыю мен эмоцияларды жасыру денсаулыққа едәуір зиян тигізуі мүмкін.
Ол Metropoles басылымына берген сұхбатында бұл әдет иммунитетті төмендетіп, адамды түрлі психологиялық және физикалық сырқаттарға бейім ететінін айтты, - деп хабарлайды aqshamnews.kz.
Фернандестің сөзінше, эмоцияларды тежеу олардың жоғалуына әкелмейді. Керісінше, іште сақталған сезімдер ағзаның стрестік жүйесін белсендіріп, оны үнемі жоғары «дайындық» күйінде ұстайды. Бұл өз кезегінде мазасыздық, күйзеліс, ұйқысыздық сияқты психологиялық қиындықтарға алып келуі мүмкін.
Сонымен қатар, эмоцияны сыртқа шығармау салдарынан ағзада түрлі физикалық реакциялар пайда болады:
- созылмалы ауырсынулар,
- әлсіздік пен тез шаршау,
- иммунитеттің төмендеуі.
Маманның айтуынша, жылағаннан кейін ағзада парасимпатикалық жүйке жүйесі іске қосылады. Ол қан қысымын төмендетіп, жүрек соғысын баяулатады, сондай-ақ, стресс салдарын бейтараптандырады.
«Эмоцияларды тежеудің орнына оларға ерік беру әлдеқайда пайдалы. Бұл – психикалық та, физикалық та саулықты сақтау үшін маңызды», – дейді Фернандес.
Эмоцияны сауатты шығарудың қарапайым тәсілдері:
- Психологтар эмоцияны іште ұстамай, оны қауіпсіз жолмен шығаруды ұсынады.
- Жылауға мүмкіндік беріңіз. Бұл – табиғи реакция, ол ағзаны жеңілдетеді.
- Әңгімелесіңіз. Жақындарыңызбен ой бөлісу эмоцияны жеңілдетуге көмектеседі.
- Жазып көріңіз. Күнделік жүргізу ішкі сезімдерді қағазға түсіруге жақсы әдіс.
- Қозғалыс жасаңыз. Жаяу жүру, спорт немесе тыныс жаттығулары стресті азайтады.
- Шығармашылыққа бет бұрыңыз. Сурет салу, музыка тыңдау немесе басқа хоббилер эмоцияны сыртқа шығарудың тиімді жолы.