29 тамызда әл-Фараби атындағы ҚазҰУ-да Қазақстан Конституциясының 30 жылдығына арналған халықаралық ғылыми-тәжірибелік конференция өтті. Шараға отандық және шетелдік заңгер-ғалымдар, мемлекеттік органдардың өкілдері мен халықаралық ұйымдар қатысты.
Қатысушылар 1995 жылғы Конституцияның тәуелсіз Қазақстанның тұрақтылығы мен дамуының берік іргетасына айналғанын атап өтті. Негізгі заң адам құқықтарын қорғау, заң үстемдігін қамтамасыз ету, мемлекеттік басқарудың ашықтығы мен цифрлық трансформациясын дамытуда ерекше рөл атқарады.
Конференцияда ҚазҰУ ректоры Жансейіт Түймебаев Конституцияның ел дамуы үшін стратегиялық маңызын атап өтіп, жаңа буын заңгерлерінің құқықтық мәдениеті мен азаматтық жауапкершілігін қалыптастырудың өзектілігін көтерді. Ал Директорлар кеңесінің төрағасы Қайрат Мәми Негізгі заңды құрметтеу – шынайы отаншылдықтың көрінісі екенін айтты.
Конституция күніне орай бірқатар заңгерлер мемлекеттік наградалармен марапатталды. Атап айтқанда, Қайрат Мәми «Отан» орденін, Игорь Рогов І дәрежелі «Барыс» орденін иеленді. Бұл – олардың конституционализмді дамытудағы еңбегіне берілген жоғары баға.
Сондай-ақ, қазақстандық ғалымдармен бірге Қырғызстан, Өзбекстан және Тәжікстаннан келген зерттеушілер конституциялық реформалар, гендерлік теңдік, жергілікті өзін-өзі басқару мен кәсіпкерлік еркіндік туралы баяндамалар жасады.
Қорытындысында, конференция тек ғылыми пікірталас емес, конституциялық ғылымды дамытуға, құқықтық мемлекетті нығайтуға арналған тәжірибе алаңына айналды.