Алматыдағы коммуналдық және инфрақұрылымдық кәсіпорындардың қызметкерлері республикалық референдумға қатысты. Қалалық қызметтердің мамандары учаскелерге тұрғылықты жері бойынша жұмыс ауысымына дейін немесе кейін, сондай-ақ отбасы мүшелерімен бірге келіп жатыр, – деп хабарлайды aqshamnews.kz тілшісі.
«Алматы Қала Жарық» КМК ұжымы жұмыс барысын тоқтатпай-ақ дауыс беруге қатысты. Кәсіпорын тәулік бойы жұмыс істейтіндіктен, қызметкерлер учаскелерге кезекшілік басталғанға дейін келіп, таңдау жасады. Кәсіпорында шамамен 300 адам еңбек етеді.
Белсенділік «Алматы Су» коммуналдық кәсіпорны қызметкерлері арасында да байқалды. Кәсіпорын мәліметінше, сағат 10:30-дегі жағдай бойынша 3618 қызметкер мен олардың отбасы мүшелері дауыс беруге қатысқан. Көпшілігі учаскелерге жақындарымен бірге келген. Жас мамандар үшін бұл қоғамдық маңызы бар шараға алғаш рет қатысу тәжірибесіне айналды.
Дауыс беруге «Алматыжылужайэнерго» ЖШС қызметкерлері де қатысты. Таңертеңнен бастап референдум учаскелеріне өндірістік бөлімшелер мен қазандықтардың мамандары келді. Алдын ала мәлімет бойынша, кәсіпорынның 1890-нан астам қызметкері мен олардың отбасы мүшелері дауыс беруге қатысқан.
«Алматы жылу жүйесі» ЖШС қызметкерлері де белсенділік танытты. Кәсіпорын мәліметінше, сағат 09:30-дағы жағдай бойынша 350-ден астам қызметкер дауыс берген. Олардың көпшілігі учаскелерге туыстарымен бірге келген.
Референдумға қаланың көлік инфрақұрылымы саласының қызметкерлері де қосылды. Алматы метрополитенінің қызметкерлері мен олардың отбасы мүшелері де дауыс беруге қатысты. Сағат 10:30-дағы мәлімет бойынша шамамен 1950 адам таңдау жасаған.
Жоғары белсенділік «Алматы Паркинг» КМК ұжымында да байқалды. Кәсіпорын деректеріне сәйкес, түске дейін қызметкерлердің 96 пайызы дауыс беруге қатысқан. Көптеген маман учаскелерге таңертеңнен бастап тұрғылықты жері бойынша келген.
Республикалық референдум 15 наурыз күні бүкіл ел бойынша өтіп жатыр. Барлық учаскелер штаттық режимде жұмыс істеп тұр. Қалалық кәсіпорындардың қызметкерлері учаскелерге келіп, дауыс беруді жалғастыруда.