"Қайрат" клубының ардагері Құралбек Ордабаев Дастан Сәтпаевтың ұлттық құрама ойынына қатыса алмауына байланысты пікір білдірді, - деп хабарлайды Аqshamnews.kz тілшісі.
Ордабаевтың айтуынша, шабуылшы соңғы матч алдында өзін жайсыз сезінгенімен, командаға көмектесу үшін бұл туралы ешкімге айтпай, толық ойынды өткізген және гол соққан. Кездесуден кейін ауырсыну күшейіп, медициналық тексеру жасалды. Нәтижесінде сол жақ жамбас бұлшықетінде шамамен төрт сантиметрдей ісіну, сіңір созылуы және микрожарықтар анықталған.
"Бұл жас ағза үшін айтарлықтай жүктеме, сондықтан дәрігерлер оған клуб базасында қалып, қалпына келу курсынан өтуді ұсынды. Клуб бұл мәселені құраманың медициналық штабымен келісіп, жағдай туралы ресми түрде хабарлады. Өкінішке қарай, бұл жолы Дастан ұлттық құрамаға көмектесе алмайды", – деді Ордабаев.
Дастан Сәтпаев қазан айындағы әлем чемпионаты іріктеу ойындарын жіберіп алады.
Еске салайық, 5 қазанда Премьер-лиганың 24-тур аясындағы "Жетісуға" қарсы матчта толық 90 минут ойнап, қарсылас қақпасына гол соққан еді.