Алматы ботаника бағы көктемгі бақшаның патшайымы деп аталатын өсімдік - форзиция туралы тың мәліметтер жариялады.
Ашық сары форзицияны Ботаника бағының қоғамдық аумағында, «Шығыс Азия», «Еуропа, Қырым және Кавказ» жинау алаңында, Жапон бағынан табуға болады. Бұл бұталар жалаңаш ағаштар мен жапырақсыз бұталардың фонында барлығының назарын бірден аударады, деп хабарлайды Almaty-akshamy.kz Zakon.kz-ке сілтеме жасап.
Форзиция (лат. Forsythia), форсайтия немесе форсиция деп аталады. Ол - зәйтүн тұқымдасына жататын бұталар мен шағын ағаштардың тұқымы. Ғылыми атау өсімдікке Корольдік бау-бақша қоғамының негізін қалаушылардың бірі шотландиялық ботаник Уильям Форсайттің құрметіне берілген. Ол өсімдікті Қытайдан Еуропаға әкелді. Барлық форзиция түрлерінің туған жері Шығыс Азия, тек еуропалық форзиция Албания мен бұрынғы Югославияда жабайы табиғатта кездеседі.