Көкшетауда агроөнеркәсіп кешені субъектілеріне мемлекеттік субсидия ретінде бөлінген бюджет қаражатын жымқыру ісі бойынша үкім шықты, – деп хабарлайды aqshamnews.kz тілшісі ҚР Қаржылық мониторинг агенттігінің баспасөз қызметіне сілтеме жасап.
Тергеуді Ақмола облысы бойынша ҚМА департаменті жүргізген.
Схема қалай жұмыс істеген?
Тергеу мәліметінше, екі жыл бойы «МолПродЖаркаин» ӘКК директоры А. Ефимкина және «Рассвет» шаруа қожалығының басшысы А. Маслов сүт өндіру мен оны терең өңдеу өнімдерінің өзіндік құнын төмендетуге арналған субсидияларды заңсыз алған.
Алайда «Рассвет» шаруашылығында көрсетілген көлемде өнім өндіруге жеткілікті мал басы болмаған.
Соған қарамастан электронды шот-фактуралар ақпараттық жүйесінде «МолПродЖаркаин» ӘКК-не 3 млн килограмнан астам шикі сүт жеткізілгені туралы жалған құжаттар рәсімделген.
Осы деректердің негізінде сүттің сары май мен қатты ірімшікке өңделгені туралы есеп жасалып, кейін субсидия алуға берілген өтінімдерді уәкілетті орган мақұлдаған.
Мемлекетке келтірілген шығын – 152 млн теңге
Өтінімдер келісілген соң қаражат кәсіпорынның есепшотына аударылған. Нәтижесінде мемлекетке келтірілген жалпы шығын 152 млн теңге болды.
Сонымен бірге алынған субсидияның бір бөлігі Ефимкинаның туысының депозиттік шотына жіберілген. Кейін сол ақшаға жалға беріп, табыс табу үшін пайдаланылған мобильді ғимарат сатып алынған.
Мүлікке тыйым салынды
Тергеу барысында айыпталушылардың мүлкіне тыйым салынған. Оның ішінде:
6 жер телімі,
4 пәтер,
11 автокөлік,
мобильді ғимарат,
өнеркәсіптік-өндірістік нысан бар.
Сот А. Маслов пен А. Ефимкинаны 6 жыл 4 айға бас бостандығынан айырды.
Мобильді ғимарат мемлекет пайдасына тәркіленді. Қалған мүлікке салынған тыйым азаматтық талап бөлігінде үкім толық орындалғанға дейін сақталады.
Үкім заңды күшіне енді.