Алматының іргесіндегі Көкжайлау беткейінде ірі қар көшкіні жүрді.
«Казселденқорғау» мекемесінің мәліметінше, қардың көлемі шамамен 50 мың текше метрге жеткен. Аймақтағы толассыз жауын-шашын мен күннің жылынуынан қар күрт еріп, соңғы күндері Іле-Алатауы беткейлерінде бірнеше қар көшкіні тіркелді, деп хабарлайды Almaty-akshamy.kz 24.kz-ке сілтеме жасап.
«Ең үлкен қар көшкіні Қотырбұлақ өзенінің бассейнінде болды, онда көлемі 400 мың текше метр қар түсті», - дейді мамандар.
Қазір қауіпсіздікті қамтамасыз ету мақсатында қар көшкіні қаупі бар аймақтарға тұрғындар мен демалушылардың кіруіне шектеу қою үшін бақылау-өткізу бекеттері орнатылды. Мұндай көшкіндерге тап болған адамдарды құтқару мүмкіндігі аз болғандықтан мамандар алдағы күндері таулы аймақтарда жаяу жүрмеуге кеңес береді.