Аталған жоба Жаһандық экологиялық қордың гранттық қаражаты есебінен қаржыландырылады.
Бұл жоба үш Каспий маңы елдері - Әзірбайжан, Қазақстан, Түрікменстанда жүзеге асырылады деп жоспарланып отыр, деп хабарлайды aqshamnews.kz.
Жалпы бюджеті шамамен 12 млн АҚШ долларын құрайды. Жоба 2025 жылдың екінші жартысында іске қосылады деп күтілуде.
Қазақстан Республикасының Экология және табиғи ресурстар министрлігі, Дүниежүзілік банк және БҰҰ жобаларды басқару басқармасы (UNOPS) өкілдері арасында «Каспий теңізінің экожүйесін қалпына келтіру: ластануды басқару және биоәртүрлілікті сақтау әлеуетін арттыру» («Blueing the Caspian Sea: Building Capacities for Pollution Management and Biodiversity Conservation») жобасының ұлттық компоненттерін бекіту бойынша онлайн кездесу өтті.
Кездесуге Қазақстан тарапынан Қазақстан Республикасы Ауыл шаруашылығы министрлігі Балық шаруашылығы комитетінің, «Қазгидромет» РМК және Халықаралық су ресурстарын бағалау орталығының өкілдері қатысты.
Кездесу барысында қатысушылар жобаның ұлттық компоненттерін, көрсеткіштерін және күтілетін нәтижелерді бағалау әдістерін егжей-тегжейлі талқылады. Қазақстан тарапы Каспий теңізінің экологиялық және гидрологиялық мониторинг жүйелерін жетілдірудің, Каспий маңы елдері арасындағы ғылыми-зерттеу қызметін дамытудың, сондай-ақ Каспий итбалығы популяциясын сақтау бойынша бірлескен жұмыстар жүргізудің маңыздылығын атап өтті.