Америкалық рэпер Ye, көпшілікке Канье Уэст есімімен танымал музыкант, алғаш рет Қазақстанға үлкен концертпен келеді, – деп хабарлайды aqshamnews.kz тілшісі.
Блогер Бейбіт Әлібековтің мәліметінше, шоу Алматыда өтеді. Концерт 2026 жылдың 14 тамызында Алматының Орталық стадионында ұйымдастырылады. Іс-шараны өткізетін First Media Group компаниясы концерт туралы толық ақпаратты кейінірек жарияламақ.
Ye концертінің шектеулі билеттеріне эксклюзивті алдын ала сатылым 20 және 21 шілде күндері Freedom SuperApp қолданушылары үшін қолжетімді болады.
Ал 22 шілдеден бастап билеттерді Freedom SuperApp қосымшасы мен Ticketon.kz сайты арқылы сатып алуға болады.
Ye – қазіргі заманның ең танымал әрі ықпалды рэп орындаушыларының бірі. Ол шығармашылық жолында The College Dropout, Graduation, 808s & Heartbreak, My Beautiful Dark Twisted Fantasy, Yeezus және Donda секілді танымал альбомдарын шығарған. Музыкант 20-дан астам «Грэмми» сыйлығын иеленген.
Канье Уэст музыкадан бөлек, дизайнер және Yeezy брендінің негізін қалаушы ретінде де танымал. Соңғы жылдары ол резонанс тудырған мәлімдемелері мен шығармашылығындағы өзгерістерге байланысты қоғам назарында жиі жүр. Соған қарамастан, оның концерттері әлем бойынша ондаған мың көрермен жинап келеді.