"FlyArystan" әуе компаниясының Астана - Өскемен бағыты бойынша рейсінде жолаушы стюардессаны ұрып, ұшақтың ұшуын кейінге қалдыруға себеп болды, деп хабарлайды aqshamnews.kz
Оқиға сағат 17:20 шамасында орын алды, нәтижесінде рейс бірнеше сағатқа кейінге шегерілді. Артынан рейстің келесі күнге ауыстырылғаны белгілі болды.
Оқиға куәгері, журналист Азамат Ергалиевтің айтуынша, 50 жас шамасындағы ер адам бортпроводник қызды ұрып, ауырсынудан жиырылып отырғанын көрген. Стюардессаны әкеткен соң, ер адам басқа жолаушылармен де жанжал шығарған. Кейін полиция келіп, ер адамды алып кетті. Барлық жолаушылар ұшақтан шығарылды.
Транспорттағы полиция мәліметтері бойынша, 47 жастағы ер адам мас күйінде стюардессаны ішінен ұрған, және ұшақтан шығып бара жатқанда "бомба" деп айқайлап, паника туғызған. Әуе кемесінің тексерісі нәтижесінде жарылғыш заттар табылмаған. Ер адамға бұзақылық әрекет және жалған терроризм туралы хабарлама үшін қылмыстық іс қозғалды. Қазіргі уақытта ол изоляторға қамалған.