Қазақстан Республикасының Президенттігіне кандидат Жигули Дайрабаев Алматы қаласына жақын жердегі Чапаев кенті маңындағы жылыжайға барды. Төртінші буындағы заманауи жылыжай 5 гектар аумақта орналасқан.
«Eurasian Green Product» кәсіпорны «Ауыл» партиясынан сайланған мәслихат депутаты Жандос Тұрсынғалиевтің ұсынысы және Аграрлық несие корпорациясы қолдауымен құрылған. Жоба таза экспортқа бағытталған. Ресейге қызанақтың түрін шығарады. Өнімдер аталған елде үлкен сұранысқа ие. Жоба тиімді болғандықтан кәсіпорын аумағын кеңейтуге мүдделі. Бірақ мәселені шешуге электр қуаты бағасының өте қымбаттығы мүмкіндік берер емес. Қазір бұрынғыдай түнгі-күндізгі тариф жоқ. Бәріне бір баға. Қыстыгүні іске асырылатын жасанды күн сәулесіне орасан көлемде электр қуаты тұтынылады. Жасанды жарыққа бір жылда 300 миллион теңге қаражат жұмсалады екен.
«Біз экспортты дамытқымыз келсе бұған жол бермеуіміз керек. «Eurasian Green Product» кәсіпорны электр қуатын ең төменгі мөлшерлеме, тариф бойынша алуы тиіс. Тариф неліктен қымбат? Себебі орта жолдан қосылған делдал көп. Кеңседен басқа ештеңесі жоқ олар электр қуатын өндіретін компаниялардан қуат сатып алып, үстеме баға қосып сатады. Мұндай жағдайда мынадай кәсіпорындарды, экспортты дамыту мүмкін емес. Егер біз жалпы экспортты, қайта өңдеуді дамытқымыз келсе мынадай заманауи жылыжайларға, ауылдық жерлерде жұмыс істейтін, тарифтерді төлеуде белгілі бір қиындықтарға тап болатын өндірістік нысандарғажалпы тарифтер бойынша ең жақсы жағдай жасауымыз керек», - деді кандидат.
Кездесу соңында жылыжай кешенінің қызметкерлері кандидаттың алдағы істеріне табыс тіледі.