Жетісуда сот орындаушысы алимент төлеуге арналған қаржыны жымқырған, - деп хабарлайды Аqshamnews.kz тілшісі.
Талдықорғанда жеке сот орындаушысы заңсыз жолмен баю схемасын қолданып, балаларды алиментсіз қалдырған.
Бірінші кезеңде ол алимент төлемдерін өндіріп алу туралы атқарушылық құжаттар бойынша заңды түрде борышкерлердің жалақысынан сомаларды ұстап қалу туралы қаулы шығарып, жұмыс берушілерге жіберген.
Одан әрі борышкерлердің жұмыс берушілерінен ақша түскеннен кейін ақшаның көп бөлігін өзіне қалдырып, қалғанын алимент өндіріп алушыларға аударған.
Мысалы, бір жағдайда сот орындаушысы борышкердің жалақысынан өндіріп алуды 2025 жылғы сәуірден бастаған.
Жұмыс беруші сәуірден маусымға дейін жеке сот орындаушысының шотына 570 мың теңгеден аса сомаға алимент төлемдерін аударған.
Сот орындаушысы алынған соманың 170 мың теңгесін ғана өндіріп алушыға аударып, қалғанын жымқырған.
Тексеру кезінде белгілі болғандай, ол осыған ұқсас схеманы бірнеше рет қолданып, оның көмегімен 2 млн теңгеден аса соманы қалтасына салған.
Талдықорған қаласының прокуратурасы өкілеттігін асыра пайдалану деректері бойынша жеке сот орындаушысына қатысты Қылмыстық кодекстің 251-бабымен соталды тергеп-тексеруді бастады.
Жетісуда сот орындаушысы алимент төлеуге арналған қаржыны жымқырған
- 15:19, 16 қыркүйек 2025
Сурет: anatili.kazgazeta.kz