Вакцинаны құю дайындықтары ағымдағы жылдың сәуір айынан бастау алған.
Алматы облысында QazVac вакцинасын құя бастайды, деп хабарлайды Almaty-akshamy.kz.
«Қарасай ауданына қарасты Абай ауылындағы «Антиген» ҰКП ЖШС алаңында “QazVac” вакцинасының 1 млн. дозасын құю жоспарланып отыр», – делінген Алматы облысы әкімінің баспасөз қызметінің хабарламасында.
Бүгінде итальян өндірісінің аппараты бір минут ішінде 60 құтыға вакцина құя алады. Әр құтыда 3 дозадан. Шілде айынан бері 300 мың дозасы құйылды. Бұл жұмыс барысын және құрал-жабдықтарды тексеруге арналған валидациялық серия. Сонымен қатар өндірістік шығарылым барлық талаптарға және асептикалық өндірістің санитарлық нормаларына сәйкес келеді. Барлық құрал-жабдықтар Еуропа, Америка және Қытайдан әкелінді. Осылайша сапаның халықаралық стандарттары кәсіпорынға жоғары техникалық дәрежеге жетуге серпін береді.
«Антиген» ЖШС-на "Жетісу" ӘКК арқылы 420 млн. теңге қаржыға лизинг негізінде 13 бірлік заманауи техникалық құрал-жабдық сатып алынды. Аталған жобаның жүзеге асуы ҚР Үкіметінің тікелей бақылауында. Алаңға Премьер-Министрдің орынбасары Ералы Тоғжанов бірнеше рет келіп, дайындық барысын тікелей бақылауда», - дейді облыс әкімінің орынбасары Батыржан Байжұманов.
Өз кезегінде «Антиген» ҰКП ЖШС директоры Нұрлан Ахметсадықов бүгінгі күні 300 мың доза құйылған вакцина биологиялық қауіпсіздік мәселелері ғылыми зерттеу институтында екенін айтты.
«Зерттеулер аяқталуға жақын. «Антиген» ЖШС алаңында құйылған вакцина тек толық тексерістен өткеннен кейін барып қана қолданысқа енгізілетінін айта кеткен жөн», - деп атап өтті директор.
Еске салсақ, Мемлекет басшысы Қасым-Жомарт Тоқаевтың тапсырмасына сәйкес, отандық сапалы QazVac вакцинасы дайындалды. Өнеркәсіптік өндірісті ұйымдастыру мақсатында Премьер-Министр Асқар Маминнің қадағалауымен өткен жылдың 12-ші маусымында биологиялық қауіпсіздік мәселелері ғылыми-зерттеу институты базасында биофармацевтикалық зауыттың құрылысы басталды. «Антиген» ҰКП ЖШС биофармацевтикалық зауытты қосқанда биологиялық қауіпсіздік мәселелері ғылыми-зерттеу институтының базасындағы екінші өндірістік алаң болды.