Бүгін Мәжіліс екінші оқылымда «Жасанды интеллект туралы» Заң жобасын және оған ілеспе заң жобаларын қабылдады.
Құжат Мемлекет басшысының тапсырмасы аясында әзірленген. Құжат жасанды интеллект саласында құқықтық және ұйымдастырушылық реттеуді, ашықтық пен қауіпсіздікті қамтамасыз етуді көздейді, - деп хабарлайды Aqshamnews.kz.
«Мемлекет басшысы таяудағы Жолдауында алдымызға үш жыл ішінде Қазақстанды жаппай цифрлық елге айналдыру жөнінде ауқымды міндет қойды. Бұл прогрессивті идеяны Президентіміз бүгін әлемнің ең басты мінбері – Біріккен Ұлттар Ұйымының төрінен де жариялады», - деді Мәжіліс Төрағасы Ерлан Қошанов.
Бүгін қабылданып отырған Жасанды интеллект туралы заң – осы бастаманы іске асыру жолындағы іргелі қадам болған.
«Ол еліміздің цифрлық дамуын жаңа деңгейге шығаруға жол ашатыны анық. Қазақстан әлемде мұндай заң қабылдаған алғашқы елдердің қатарында. Заңды қабылдау барысында цифрландыру саласындағы озық әлемдік тәжірибелер мен тәуекелдердің бәрі ескерілді. Әділеттілік, заңдылық, ашықтық, адам құқықтары мен жеке мәліметтерді қорғау басты принцип ретінде қарастырып отыр», - деді Ерлан Қошанов.