Жұмысшы мамандықтар жылы – еңбек нарығындағы өзекті мәселелерді шешуге бағытталған ірі бастама. Түркістан облысында осы бағытта жүйелі жұмыстар атқарылып, нақты нәтижелерге қол жеткізілуде. Облыс әкімі Нұралхан Көшеровтың төрағалығымен өткен жиында осы мәселе кеңінен талқыланды.
Бастаманың негізгі мақсаты – жастардың техникалық және өндірістік мамандықтарға қызығушылығын арттыру, жұмыссыздық деңгейін төмендету және еңбекке құрмет сезімін қалыптастыру. Сонымен қатар жаңа жұмыс орындарын ашу, шетелдік инвесторлармен бірлескен кәсіпорындарға отандық кадрлар даярлау, кәсіби білімнің қолжетімділігін қамтамасыз ету көзделген.
Бүгінде облыстағы 50 техникалық және кәсіби білім беру ұйымында 47 мыңнан астам студент 84 мамандық бойынша оқып жатыр. Жаңа оқу жылында 15,5 мың грант бөлініп, соның ішінде 8 880 грант жұмысшы мамандықтарына берілді. Дуалды жүйемен 31 мыңнан астам студент білім алуда. Өткен жылы колледж түлектерінің 75 пайыздан астамы жұмысқа орналасқан.
Жыл басынан бері аймақта 64 бос жұмыс орындары жәрмеңкесі ұйымдастырылып, 7 мыңға жуық вакансия ұсынылды. Сонымен қатар 10 мыңнан астам оқушы мен студент 37 кәсіпорында болып, өндірістің жұмыс барысымен танысты. Колледждерде стартап жобалар қолға алынып, халықаралық аккредитация жүргізілуде.
Жалпы 2025 жылы «Аймақтық карта» аясында 130 мыңнан астам жұмыс орны ашу жоспарланған. Қыркүйек айына дейін оның 100 мыңнан астамы іске асырылып, 32 мыңнан астамы жұмысшы мамандықтарына арналды.
Түркістан облысында жүргізіліп жатқан бұл жұмыстар еңбек нарығындағы сұранысқа жауап беріп қана қоймай, жастардың кәсіби біліктілігін арттырып, аймақтың тұрақты дамуына ықпал етуде.