Жапонияның солтүстігінде соңғы ондаған жылда болмаған қарлы боран салдарынан адам шығыны көбейіп, төтенше жағдай ушығып отыр, деп хабарлайды Aqshamnews.kz тілшісі.
Күшті қар жаууынан Жапония аумағында көп метрлік қар үйінділері пайда болып, ауыр қайғылы оқиғалар жиілеген. Ресми деректерге сәйкес, табиғи апат салдарынан 46 адам қаза тауып, 558 адам түрлі жарақат алған. Жергілікті БАҚ мәліметінше, кейбір марқұмдардың денесі бірнеше күн бойы қар астында қалып, дер кезінде табылмаған.
Жапон билігінің хабарлауынша, жазатайым оқиғалардың басым бөлігі ғимараттардың шатырынан құлаған қар массасының адамдарды басып қалуынан болған. Сондай-ақ зардап шеккен өңірлерде тұрғын үйлердің опырылып құлағаны тіркелді.
Қаңтар айының соңынан бері елдің солтүстігінде бұрын-соңды болмаған қарлы боран тоқтамай тұр. Аомори және Аджигасава қалаларында қар жамылғысының қалыңдығы бір метрден асқан. Ал кейбір аудандарда қардың биіктігі 4,5 метрге дейін жеткен.
Аомори префектурасының губернаторы Соичиро Миясита қала әкімдігінің көшелерді, үйлерді және теміржол желілерін қардан тазалауға шамасы жетпей отырғанын мәлімдеді. Осыған байланысты ақпан айының басында жапон армиясынан көмек сұралған. Қазір әскери қызметкерлер, әсіресе, жалғызбасты және қарт адамдарға қар тазалау жұмыстарына қолғабыс көрсетіп жатыр.