Бүгінгі таңда дүние жүзіндегі және көршілес елдердегі геосаяси жағдайдың күрделенуі кезінде Президент Қасым-Жомарт Тоқаевтың кезекті Жолдауы үлкен оптимистік маңызға ие. Негізінен, Президент халыққа бұрынғы Жолдауда айтылған мәселелердің шешілгені немесе әлі де шешілмегені туралы айтып өтті. Біздің байқағанымыз, Президент әрбір Жолдауын ел болашағын елең еткізетін өткір мәселелер мен ұлт болашағына арналған жоспарлар негізінде құрастырып отыр.
Дегенмен, экономикалық, әлеуметтік, білім беру, тәрбие, ғылым, экология, демографиялық және өнеркәсіп сияқты мәселелерді шешу бағыттары анық. Атап айтқанда, алдымен ақша-несие саясаты мен фискалды саясат арасындағы үйлесімсіздікті жою қажеттігі көрсетілді. Бұл елімізде көптеген азаматтардың банктерге қарызға батып, қаржылық проблемаларға тап болып отырғанын аңғартады. Осыны Мемлекет басшысы ерекше атап өтті. Сондықтан «Қарызсыз қоғам» жобасы аясында халықты білімге, жастарды адал еңбек етуге шақырды.
Қазір бүкіл әлемде цифрлық технологиялар мен жасанды интеллектке қатысты бәсеке қызып тұр. Барлық жерде ресурс үшін талас жүруде. Климаттың өзгеруі, азық-түлік қауіпсіздігі және демографиялық тұрғыдан орнықты даму ең өзекті мәселелерге айналған. Бір сөзбен айтқанда, адамзат тарихында бұрын-соңды болмаған сын-қатерлер мен түбегейлі өзгерістер дәуірі басталды. Сонымен қатар, Жолдауда сөз болғандай, Атом электр станциясын салу мәселесі әлеуметтік желілерде кеңінен талқылануда. Президент қоғамда үлкен резонанс тудырып отырған зорлық-зомбылық, әлеуметтік қиындықтар, медицина саласындағы қызмет сапасының төмендігі, білім беру мен ғылымдағы сәйкессіздіктер сияқты мәселелерге жан-жақты тоқталып өтті. Биыл қазан айында өтетін Атом электр станциясын салуға қатысты жалпыұлттық референдум да өте өзекті мәселе болып отыр.