Таяу Шығыста жағдай күрт шиеленісіп, Израиль мен Иран арасындағы әскери қақтығыс ашық текетіреске ұласты. Оқиғалар бір күннің ішінде бірнеше кезеңмен өрбіді. Аqshamnews.kz тілшісі басты хронологияны ұсынады.
Израиль «превентивті соққы» жасағанын мәлімдеді
28 ақпанда Израиль Иранға қарсы «превентивті соққы» жасағанын ресми түрде жариялады. Тегеранда кемінде бірнеше жарылыс тіркелген.
Israel Defense Forces (ЦАХАЛ) ел аумағында төтенше жағдай режимі енгізіліп, халыққа ықтимал зымыран соққыларына дайын болу жөнінде ескерту жасалғанын хабарлады. Сиреналар қосылып, азаматтарға паналау орындарына жақын жүру тапсырылған.
Израиль неге мұндай қадамға барды?
Израиль билігі бұл қадамды «елге төнген қауіптің алдын алу» деп түсіндірді. Ресми мәлімдемеде операцияның Иран тарапынан болуы мүмкін қауіп-қатерге жауап ретінде жасалғаны айтылды.
АҚШ позициясы қандай?
Көп ұзамай АҚШ президенті Дональд Трамп операция Иранның ядролық және зымыран бағдарламаларына қарсы бағытталғанын мәлімдеді.
Оның айтуынша, Вашингтон Тегеранның ядролық қаруға қол жеткізуіне жол бермеуді мақсат етеді.
Иранның жауап шабуылы
Сол күні Иран Израильге және АҚШ-тың Таяу Шығыстағы бірқатар әскери нысандарына жауап соққы жасады.
Израиль бағытына ондаған баллистикалық зымыран ұшырылғаны хабарланды. Сонымен қатар АҚШ-тың Бахрейн, БАӘ, Катар мен Кувейттегі базаларына да қауіп төнгені айтылды.
Тегеранның мәлімдемесі
Тегеран Вашингтон мен Тель-Авивтің әрекетін халықаралық құқықты бұзу деп бағалады. Иран тарапы «қызыл сызық қалмағанын» айтып, қарсы іс-қимыл ауқымы кеңеюі мүмкін екенін ескертті.
Трамптың қатаң мәлімдемесі
Дональд Трамп АҚШ-тың Иранға қарсы ауқымды әскери операция бастағанын растады. Ол бұл әрекетті Америка мен оның одақтастарын қорғау қадамы ретінде сипаттады.
Сонымен қатар Трамп Иран халқына үндеу жасап, билікті өз қолына алуға шақырды.
Еуроодақтың реакциясы
Еуропалық Одақ басшылары жағдайға алаңдаушылық білдіріп, тараптарды сабырға шақырды. Брюссель негізгі екпінді дипломатиялық жолмен реттеуге және бейбіт тұрғындардың қауіпсіздігін қамтамасыз етуге бағыттап отыр.
Қазақстанның шұғыл шешімдері
Аймақтағы ахуалға байланысты Қазақстан да жедел шаралар қабылдады.
Қасым-Жомарт Тоқаев күштік құрылымдарды тәулік бойы жұмыс режиміне көшіру туралы тапсырма берді. Үкіметте арнайы мониторинг тобы құрылып, жағдай тұрақты бақылауға алынды.
Әуе кеңістігі жабылып, рейстер тоқтатылды
Қақтығыс салдарынан Таяу Шығыс бағытындағы әуе кеңістігіне шектеулер енгізілді.
Air Astana аймақтағы бірқатар рейстерін уақытша тоқтатып, бағыттарды қайта жоспарлай бастағанын хабарлады.