2023 жылы қайта құрудан кейін «Южный» қазандығы іске қосылып, қуаты 41% - ға 190 Гкал/сағ. дейін ұлғайды. Сонымен қатар, Есқараев көшесі мен Гагарин даңғылында «Орбита» қазандығымен жалғасатын 900 метр жылу желісі қайта құрылды. Бұл туралы Алматы қаласының әкімі Ерболат Досаев Бостандық ауданы тұрғындарымен кездесуінде мәлім етті, деп хабарлайды аlmaty-akshamy.kz.
Осы жылдың қыркүйегіне дейін Есқараев көшесінің бойымен 660 метр жылу желілерін қайта құру жоспарланған.
Өткен жылы 3,5 шақырым су құбырын қайта жаңарту жұмыстары аяқталса, биыл 3,2 шақырым желі құрылысын аяқтау жоспарланып отыр.
Ауданның жоғарғы бөлігінде тұратын тұрғындарды сапалы ауыз сумен қамту үшін «Ерменсай» шағын ауданында өнімділігі тәулігіне 9 мың м3 су жинау құрылысын салуға жобалау-сметалық құжаттама әзірленуде. Мемлекеттік сараптамасы осы жылдың мамыр айында шығады деп күтіп отырмыз. Құрылыс-монтаждау жұмыстарының болжамды құны – 17 млрд. теңге. Сонымен қатар, «Нұрлытау» шағын ауданында сумен қамтамасыз ету үшін 62 шақырым және су бұру үшін 34 шақырым желілерін салуға жобалау-сметалық құжаттама әзірлену үстінде. Бұл құрылыс жұмыстарының да мемлекеттік сараптамасы мамыр айында шығады деп болжап отырмыз. Жоспарланған жұмыстың болжамды құны – 14 млрд. теңге, деді қала әкімі.
Осы жылы жалпы суммасы 7 млрд. теңге болатын жалпы ұзындығы 7,5 шақырым инженерлік желілерді қайта жаңарту жоспарланып отыр. Оның ішінде 500 метр кәріз, 5,3 шақырым жылу желілері және 1,7 шақырым орташа қысымды жерасты газ құбыры.
