Израильдік БАҚ пен халықаралық агенттіктер Иранның Жоғарғы көшбасшысы Әли Хаменеи израильдік әуе соққысы салдарынан көз жұмған болуы мүмкін екенін хабарлады, деп хабарлайды Aqshamnews.kz тілшісі.
Reuters және Израильдің 12-арнасы Иранның Жоғарғы көшбасшысы Әли Хаменеи резиденциясына жасалған әуе соққысынан қаза тапқан болуы ықтимал деген ақпарат таратты. Мәлімет аты-жөнін жарияламаған израильдік жоғары лауазымды шенеунікке сілтеме жасап берілген.
Ал Axios тілшісі Барак Равид Израильдің АҚШ-тағы елшісі Йехиэль Лейтердің Хаменеи өлімі туралы мәліметті америкалық ресми тұлғаларға жеткізгенін жазды.
Бұған дейін Израиль премьер-министрі Биньямин Нетаньяху Иранға қарсы әскери операция басталғаннан кейінгі телеүндеуінде Хаменеи израильдік соққылар нәтижесінде көз жұмған болуы мүмкін екенін меңзеген.
«Бұл тиранның енді жоқ екенін білдіретін көптеген белгілер бар», – деген болатын ол.
Сонымен қатар, былтыр The New York Times Хаменеи ықтимал қақтығыс жағдайында билік транзитінің арнайы тетігін алдын ала белгілеп кеткенін жазған. Басылым мәліметінше, ол әскери және мемлекеттік лауазымдар үшін бірнеше деңгейлі мұрагерлік жүйесін бекіткен.
Сарапшылар ықтимал мұрагерлердің бірі ретінде Ұлттық қауіпсіздік жоғары кеңесінің хатшысы Әли Лариджаниді атайды. Ол бұрын Ислам революциясы сақшылары корпусының басшысы болған және ел ішіндегі саяси ықпалы жоғары тұлғалардың бірі.
Әзірге ресми Тегеран бұл ақпаратты растаған да, жоққа шығарған да жоқ. Аймақтағы жағдай шиеленіскен күйінде қалып отыр.
Еске салайық, бұған дейін АҚШ президенті Дональд Трамп Иран аумағында ауқымды әскери операция басталғанын мәлімдеген еді.
Кенеттен басталған әскери шабуылдар салдарынан Таяу Шығыстағы жағдай күрделеніп, әуе қатынасы шектеліп, көптеген туристер елдеріне жете алмай отыр. Оның ішінде қазақстандықтар да бар.
