Қазақстандық диджей Imanbek Spotify сервисінің арнайы сыйлығына ие болды, деп хабарлайды Аlmaty-akshamy.kz ҚазАқпаратқа сілтеме жасап.
Ресурстың баспасөз қызметі таратқан мәліметке сенсек, Imanbek - ТМД бойынша трегі 1 млрд-тан аса мәрте тыңдалған тұңғыш музыкант. Ол бұл межеге өткен жылдың қазан айында жеткен.
Оның Roses-Imanbek Remix атты әуенін тыңдағандар саны бүгінде әлем бойынша 1,5 миллиардтан асып кетті.
Музыка сервисі диджейді құттықтап, сыйлықты табыстады.
«Артисті осындай ірі жетістікпен және клубқа қосылуымен құттықтаймыз. I is for Imanbek!» делінген хабарламада.
Осылайша Imanbek Billions Club-қа қосылды. Оның плейлист бойынша «көршілері» - Билли Айлиш, Трэвис Скотт, Адель және басқа әлемдік атақты музыканттар.
Мұның алдында Spotify-дың дәл осы марапаты канадалық рэпер Дрейк, норвег диджейі Kygo және британ әншісі Дуа Липаға тапсырылған еді.