Қазақстан, Қырғызстан және Ресей Ішкі істер министрліктерінің киберполициясы бірлескен операция жүргізіп, ТМД елдерінің азаматтарына қатысты интернет-алаяқтықпен айналысқан трансұлттық қылмыстық топтың қызметін тоқтатты, - деп хабарлайды Aqshamnews.kz Polisia.kz-ке сілтеме жасап.
8 қыркүйекте күдікті Бішкекте қолға түсті. Оның жалға алған пәтерін тінту барысында 32 слотты сим-бокс, үшінші тұлғаларға тіркелген 70-тен астам SIM-карта, IP-адрес алмастыруға арналған құрылғылар, компьютерлер мен телефондар тәркіленді.
Алдын ала мәлімет бойынша, күдікті заңсыз әрекеттері үшін аптасына 500 АҚШ доллары көлемінде сыйақы алып отырған. Мұндай техника арқылы қылмыскерлер банктер, мемлекеттік органдар мен маркетплейстер атынан жаппай жалған қоңыраулар мен хабарламалар таратып, азаматтардың қаражаты мен жеке деректерін иемденуді көздеген.
Жыл басынан бері Киберқылмысқа қарсы іс-қимыл департаменті 77 сим-боксты және алаяқтар пайдаланған 90 мыңға жуық SIM-картаны тәркіледі.
Еске салайық, 16 қыркүйектен бастап дроптардың әрекеті үшін жауапкершілік, онлайн-несие беруді шектеу және SIM-карталардың айналымын реттеуді көздейтін жаңа заң нормалары күшіне енеді.