Жеті адам мерт болды, көптеген адам жарақат алды.
Жұма күні Шығыс Иерусалимдегі Неве-Яаков ауданында синагога жанында террористік акт ұйымдастырылып, жеті адам қаза тапты, деп хабарлайды Аlmaty-akshamy.kz
Израиль полициясы баспасөз қызметінің мәліметінше, еш кінәсі жоқ жеті адам мерт болды, көптеген адам жарақат алды.
«Иерусалимдегі террористік акт: кешкісін жергілікті уақыт бойынша сағат 20-30-дар шамасында террорист Иерусалимде Неве-Яаков бульварындағы синагогаға келіп, жақын арадағы адамдарға оқ жаудырған. Полиция бірден оқиға орнына жетіп, террористің орналасқан жерін анықтап, оған қарай оқ атты. Террорист қолға түсті», - делінген жергілікті полиция хабарламасында.
Осыған дейін сегіз адамның қаза тапқаны туралы хабарланған болатын. Полиция болған оқиғаны теракт деп бағалады.