Ұлттық құндылықтарымызды дәріптеп, әлем жұртшылығына таныту бағытында Алматы қаласы Наурызбай ауданындағы №176 мектеп-гимназияда халықаралық ғылыми-тәжірибелік семинар өткізілді.
Семинар жұмысының өткізілуіне тікелей қолдау көрсетуші Алматы қаласы Білім басқармасы, Алматы қаласы Білім басқармасының «Қалалық білім берудегі жаңа технологиялардың ғылыми-әдістемелік орталығы» мен Наурызбай ауданы Білім бөлімі.
Халықаралық семинар жұмысына 550 қолөнер шеберлері мен көркем еңбек пәнінің ұстаздары қатысуға өтініш білдірген. Оның ішінде республиканың 19 қаласынан онлайн түрде қосылып, семинар жұмысын тамашалады. Сонымен қатар, Түркия Республикасы, Өзбекстан Республикасы және Қырғыз Республикасының жоғары оқу орындары оқытушылары онлайн түрде өз баяндамаларын ұсынды.
Халықаралық семинар келесі мәселелер бойынша жұмыс жүргізді:
Еңбекке балу [ұлттық қолөнер]. Мектептегі еңбекке баулу пәні бойынша оқушыларды ұлттық кәсіпке баулу, оларды еңбекқор етіп тәрбиелеуде маңызды деп есептейміз. Ұлттық мәдени құндылықтарға баулу ісі мектептегі бейнелеу өнері пәнінен басталатыны белгілі. Осы тұрғыдан бейнелеу өнері пәнін мектепте оқытудың негізгі мақсаты қоршаған орта әсемдігін көру, сезіну, қабылдау қасиеттерін қалыптастыру, эстетикалық талғамын, шығармашылық қабілетін жетілдіру, көркемдік қаракеттерді өз бетімен орындауға үйрету болып табылады.
Ұлттық мектеп формасы. Мектепте оқушы формасына қойылатын басты талап – оның ұлттық сана-сезімін оянуына ықпал ете білуі. Мектеп оқушылары арасында ұлттық нақыштағы мектеп формасын енгізу.
Алматы қаласында алғаш рет ұйымдастырылған көркем еңбек пәні мұғалімдері арасындағы халықаралық ғылыми-тәжірибелік семинар өте жоғары деңгейде өткізілді. Семинарда талқыланған мәселелер болашақта өз шешімін табатынына сенімдіміз.