Алматыда сот қызға тиісу ісі бойынша курьер жігітті кінәлі деп таныды. Ер адам «ұсақ бұзақылық» бабы бойынша 7 тәулікке әкімшілік қамауға алынды, – деп хабарлайды aqshamnews.kz тілшісі.
Не жағдай болды?
Полиция департаменті мен Алматы қалалық сотының мәліметінше, ер адам әкімшілік жауапкершілікке тартылған. Әкімшілік құқық бұзушылықтар жөніндегі мамандандырылған ауданаралық сот оның әрекетін ҚР ӘҚБтК-нің 434-бабы – «Ұсақ бұзақылық» бойынша саралаған.
Курьердің кінәлі деп танылып, 7 тәулікке әкімшілік қамау жазасы тағайындалғаны айтылды.
Жәбірленуші курьерді жыныстық сипаттағы әрекеті үшін қылмыстық жауапкершілікке тартуды талап еткенімен, іс әкімшілік өндіріс аясында қаралған.
Оқиғаның мән-жайы
Оқиға 14 ақпанда болған. Жәбірленуші Дарьяның айтуынша, курьер оған шамамен 20:40-та гүл жеткізген. Букет үлкен болғандықтан, қыз курьерден себетті дәліздің еденіне қойып беруін сұраған.
Оның сөзінше, курьер пәтерге кіріп, гүлді қойғаннан кейін қыздың халатынан ұстап, оны ашып жіберіп, кеудесіне қол тигізген. Дарья қатты шошып, ер адамды үйден қуып шыққанын және күйзеліс жағдайында есікті әрең жапқанын айтқан.
Оқиғадан кейін қыз курьерге шағымданатынын ескертіп, хабарлама жазған. Ал жауап ретінде, Дарьяның айтуынша, ер адам дөрекі сөз айтып, «ештеңе істей алмайсың» деген мазмұнда жауап қайтарған.
Қыз бірден полиция шақырып, арыз жазғанын жеткізді. Кейін ер адамның InDrive сервисінде жұмыс істегені анықталған.
Компания өкілдері курьердің аккаунты бұғатталғанын хабарлады.