Telegram мессенджерінің негізін қалаушы Павел Дуров өзінің жеке Telegram каналында өткен айда Парижге келген соң, француз полициясы оны төрт күн бойы тергегенін жазды, деп хабарлайды aqshamnews.kz.
Дуров компанияның Еуроодақ сұраныстарына жауап беретін ресми өкілі бар екенін айтып, осы жағдайға таң қалғанын жеткізді.
Сонымен қатар, Франция азаматы болып табылатын Дуров, бұған дейін Біріккен Араб Әмірліктеріндегі Франция елшілігіне жиі барып тұрғанын, бірақ осы уақытқа дейін француз билігі оған ешқандай сұрақ қоймағанын атап өтті.
Дуров Telegram көптеген елдермен ынтымақтастық орнатуға дайын екенін, бірақ өзінің принциптерінен бас тартпайтынын айтты.
Ол мысал ретінде Ресейдің мессенджерден "шифрлау кілттерін" беруін талап еткенін, бұл талаптың қабылданбағанын және оның нәтижесінде Telegram-ның уақытша бұғатталғанын келтірді. Иран билігі де наразылық білдірушілердің арналарын бұғаттауды талап еткен, бірақ бұл сұраныс та қабылданбағандықтан, Telegram Иранда тыйым салынды.
Сонымен қатар, Дуров Telegram-ды анархистер үшін "жұмақ" деп атаған пікірлерді жоққа шығарды.
Ол күн сайын миллиондаған зиянды жазбалар мен арналардың жойылып жатқанын, сондай-ақ Telegram-да күнделікті ашықтық есебі жүргізілетінін және төтенше сұраныстарды жедел өңдеу үшін үкіметтік емес ұйымдармен тікелей байланыс арналары орнатылғанын айтты.
