Алматы қаласы Мәслихатының шешімдері өзгерістерге сәйкес жаңартылып жатыр. Алматы қаласы Экология және қоршаған орта басқармасының басшысы міндетін уақытша атқарушы М. М. Гайсин мәслихат сессиясында ерекше қорғалатын табиғи аумақтарды пайдаланғаны үшін төлемақы мөлшерлемелерінің күшін жою қажеттігін түсіндірді.
Бұған дейін, 2012 жылы Қазақстан Республикасының Салық кодексінің 591-бабына және «Ерекше қорғалатын табиғи аумақтар туралы» заңның 10-бабына сәйкес, Алматы қаласы Мәслихатының шешімімен "Медеу" мемлекеттік өңірлік табиғи паркі үшін төлемақы мөлшерлемелері бекітілген болатын. Бұл шешімге 2014 және 2018 жылдары редакциялық өзгерістер енгізілген.
Алайда, 2024 жылғы 9 қыркүйекте Салық кодексіне енгізілген өзгерістерге байланысты, ерекше қорғалатын табиғи аумақтарды пайдаланғаны үшін төлемақыны реттейтін баптар алынып тасталды. Заңға енгізілген тиісті түзетулер нәтижесінде, енді Алматы қаласы әкімдігі мен мәслихатының төлемақы мөлшерлемелерін белгілеуге құзыреті жоқ.
М. М. Гайсиннің айтуынша, бұл өзгерістер Алматы қаласының құқықтық құжаттарын ҚР қолданыстағы заңнамасына сәйкестендіруді талап етеді. Осыған орай, "Медеу" мемлекеттік өңірлік табиғи паркіне қатысты төлемақы мөлшерлемелерін бекіткен Мәслихат шешімдерінің күші жойылды деп тану қажеттігі туындап отыр.
"Құрметті депутаттар, бұл өзгеріс құқықтық реттеудің қазіргі талаптарына толық сәйкес келеді және заңнамалық нормаларды сақтау мақсатында жасалуда. Қолдауларыңызды сұраймын", – деп қорытындылады М. М. Гайсин.