20 қаңтарда Шымкентте жол апаты болып, соңы жаппай төбелеске ұласты. Салдарынан 40 жастағы ер адам қаза тапты. Полиция күдіктілерді іздестіріп жатыр, - деп хабарлайды aqshamnews.kz тілшісі.
Оқиға Ерімбетов пен Рысқұлов көшелерінің қиылысында болған.
Екі жүргізуші бір-бірімен жанжалдасып жатқанда тағы бір көлік тоқтап, одан шыққан адамдар да жанжалға араласқан. Төбелес кезінде бірнеше зардап шегіп, екі адам ауруханаға жеткізілді. Алайда бір адам көз жұмды.
Полиция болған жағдайқа қатысты қылмыстық іс қозғады.
"Адам өлтіру дерегі бойынша қылмыстық іс қозғалды. Шымкент Полиция департаменті күдіктілердің жүрген жерін анықтау және оларды ұстау үшін шаралар қабылдап жатыр. Күдіктілерді анықтауға және ұстауға бағытталған жедел іздестіру іс-шараларына департаменттің барлық күш-құралы жұмылдырылды", - деді полиция.
