«Ақ жол» Демократиялық партиясы Ұлттық кеңесінің пленумы Қазақстанда атом электр станциясын (АЭС) салу мәселесін талқылады.
Бүгін Президент Қасым-Жомарт Тоқаевтың соңғы Жолдауында жарияланған жалпыхалықтық референдум мәселесіне байланысты партияның ресми ұстанымын анықтау мақсатында «Ақ жол» демократиялық партиясының Ұлттық кеңесінің пленумы өтті.
Пленумда энергетика министрі Алмасадам Сәтқалиевтің баяндамасы тыңдалды. Ол еліміздегі инвестициялық жобалардың жүзеге асырылуын тежейтін проблемалар, 8 ГВт электр энергиясының тапшылығы, атом энергетикасын дамытудың болашағы және АЭС құрылысының әртүрлі нұсқалары туралы ақпарат берді.
«Ақ жол» демократиялық партиясы үшін отандық бизнес пен өнеркәсіпті энергиямен қамтамасыз ету ең өзекті мәселелердің бірі болып табылады. Осыған орай, энергетика министрлігі өкілдері, соның ішінде вице-министр Сұңғат Есімханов пен «Қазақстан атом станциялары» ЖШС бас директоры Тимур Жантикин Ұлттық кеңес мүшелерінің көптеген сұрақтарына жауап берді.
Мәжіліс вице-спикері Дания Еспаева, Мәжіліс депутаттары Қазыбек Иса, Ерлан Барлыбаев, сондай-ақ басқа да партия мүшелері ықтимал балама шешімдер мен АЭС құрылысының мердігерін таңдауға қатысты сұрақтарын қойды.
Талқылау нәтижесінде пленум атом энергетикасын дамыту мен АЭС салуды қолдап, саланы дамытудың прогрессивті жолын таңдау қажет екенін атап өтті. Сонымен қатар, қауіпсіздікті қамтамасыз ету мәселесіне ерекше көңіл бөлінді.